Lola, ano ta dakul daraga ngonyan, nagaaki
Pero mayong agom?
Ano ta kaidto ‘La dakulang disgrasya an
Maakian?
Simbaga daw ko ‘La kun ano ta dakul daraga ngonyan
Nagyoyopyop na nin Malboro
Magpabuga garo tsiminiya
An koko madarag na, an hangaw mabata pa
Ano ta ngonyan dai na napondo an tawo pagbagting nin alas seis
Magkimotkimot an nguso nin pamibi sa Angeles
Ano ta diit na an nangungurus pag-agi sa simbahan?
Garo baga an mga drayber na sana kan Francia
An napangurus ta habong madisgrasya
May rosaryo pang sabit, ginagamit na anting-anting baga
Ano ta an mga bagongtawo kun mabisa ,
Tinitikwas na sana an palad ninda,
Binibisa an saindang angog mansana?
Ano ta bako nang tarakot an daraga makipagseks
Sa lalaking kapwa liberated
sa bagay na dapat ginigibo sana, kaidtong may lisensya?
Ano ta dakul nang nabibihag sa teks sana,
Madaling mapasimbag, mapa-oyon
Paagi nin selpon, sa lalaking tataong magdoondoon?
Lola, ano ta iba nang maray an kinaban?
Kaidto balalong totoo an pinopokpok kun may
Gustong inaapod
Lola, kaidto kamo kun sinisirip nin mga pilyo
Sinusukib an tiklad sa pantaw, maanyapan an susong nakalaylay
Kan daragang nagtatabo’ sa dulay
Dai mo aram ‘La, dai na kaipuhan ngonyan an pantaw
Makamansay lang nin lubot na hilaw?
Iba na talaga, ta an mga tinedyer ta
Sa monitor nasirip sana, nasurf sa mga sex sites baga
Gabos na klaseng boobs, mga baak pa, nakikita ninda!
Lola, ako nariribong
Dai ko marorop an gabos ining nagtatalibong
Iba nang maray an hiro, an nginisi asin an harakatak
Iba naman na maray an mga bagay na pigkakasibotan
Pigkakaintresan, sabihon pa kompyuter an pigkakarongawan!
Naiba na kaya an pagtubod kan mga tawo?
Kaidto simple an orolay
Dapit lang sa karsonsilyong laylay
O ki Kikay na nalislis an tapis
O ki Gurang Kakoy na paramama
Mapula na an ngipngip kasasapa
Kan bunga, apog sa buyo na dahon
Lola, iba na palan an kinaban mo
Sa kinaban kan saimong apo
