Sa Bangging Tagnong

Mata ko nagmamansay
Sa bangging madiklom
Madangog an bura’ lamang
Kan barukikik sa malomlom

Hinahanap kan sakong puso
An ribok sa harayong maromarom
Alagad, toninong an bangging tag-nong!
Ni dikit na agagha, dai nadangog sa panganoron.

Horasa’ an sakong puso
Dai natitiwasay
Rinororop an dai maipaliwanag
Hararom na mga bagay…!

Sa irarom kan daghan ko
Nagngongoyngoy
Sa kawa’ran nin paghidaw
Mga nakaaging panahon

Tinatakma pinupugolan
Alagad dai makapotan
Dunong nin mga gugurang
Natalbong sa kalingawan

Siisay ako, siisay kita?
Buksi daw puson ta
May burabod pa baga
Kan mga agimadmad ta?

Inarukay sinda, inalok maglakaw
Sa bangging diklom
Magbaktas kan dalan
Pabalik sa hinalean

Matunok, magapo an agihan
Mamundo an mga nakita nadalan
Daing nabangon, nabungkaras
Paglanat, pagsunod na kaskas

Sa kapatagan, kadlagan
Huna dai malalagalag
Lawigaw an mga dana’
Daing tapos an pagbaklay

Madiklom an bangging tagnong
Ni siyap, ni bura’ daing nadadangog
Siisay an maisog, oragon na masosog
Kan satong kalag sa modernong panahon?