PAGLANAT NIN PUSO

Ki Clemente Alejandria

Wara na sa puso an kaginhawahan,
Wara na sa isip an katiwasayan
Wara na sa mata an kaliwanagan
Poon pagkawara ninsi namomotan.

Iyong pagsalihid an labing pagbakho,
Dusa, haronahod, horasa nin puso,
Tinagolnodan mo nin pasiro’siro’
Sa tahaw nin dagat nin makuring mundo.

Ngonian pakatanaw sa lawod nin dagat,
Kinadenahan mong bako man na batbat,
Kundi pagkamoot. Dai malolongat……
Dahel sa kadena puso ko naglanat.

Dagos mong bayaan na mag’atong-atong
Ibinilang mo na sa ipinalubong.
Sadyang pinara’ mo gayod sa giromdom.

Ay haen ka na daw, ngonian haen ka na!
Haen si saimong mapungay na mata,
Salimbadi lamang an nag-aagagha,
Maski madale lang…. pironga mansana!

Lipongaw nasabong kun naroromdoman
An banhing maogma nin pagkamootan,
Dolot sa saimo kan enot na aldaw.
Nin satuyang pusong daing pagkalingaw.

Aanhon an tipan kun sa pagkamoot,
Sa kadara, sadyang sadyang lanyag an katood.
Si horasa sana nin isip ko boot,
Masarig nang saksi nin pusong maimbod.

Luhang mapapait nanpan’ ilay-igay
Sa duwa kong mata, sa sakit katangbay,
Sugo nin puso kong hidaw sa giraray
Kan pagkamoot mong panong pagkaugay

Boot ko kuta nang saimo horoton
Na ining kadena saimong hubaron ,
Kundi kun sanga’ na sa simong giromdom,
Maraot; ta ika nasa pagtoninong.

Boot ko kutanang agrangayan taka,
Kundi, inisip kong matitingol ka pa.
Manarig ta ika yaon sa pag-ogma;
Manonongod sako….. hala!…ika….sana

An hapot ko lamang kan saimong pagbaya
Tadaw ta bayaan na may tanikala?
Kundi dai bale naman sa sakuya.
Ini… kabotan mo, Ay! Ay sakong mutya.

.