HAEN KA?

Haen Ka,

kan ako pongaw, daing kadamay?

Haen ka,

Kan ako nagkakalagkalag, simong lawog inaaninag?

Haen ka,

Kan an puso ko nalugadan, ika an dahelan?

Nag’agi an taon , sako takang hinihidaw,

Puso ko naglulugolugo,

Ika an minamawot na totoo.

Ni anyap sako dai ka naglingon,

kan ika naghale, ni dai lamang girong.

Hinapot taka, ano an sarahotan,

maski ano baga sako nang ooyonan,

Siloksigok kan sakong boot,

sinaray ko asin pigrirong.

Habo kong ipamate simo, na ako nakulgan nin hararom.

Lugad dai matikom, magpila man bibilangon mga taon,

Romdom ko pirmi an huyom nin simong ngabil na mapula,

Dai mo inako sakong paglanyag, pagranga’danga’

Hinahanap an simong kasimbagan na mayo lamang baga,

Takdom an simong ngimot dai kang sinayod ni sarong kataga’.

Garo ka sarong burak hinalat magbukad,

Hogophogop ko makita taka magrambong na hayag,

Mag-tayap an hamot na nakakabihag,

Sa siisay man na lalake na simo makuring nabangkag!.

Garo ka sana nagsolnop na banaag,

Dai mariraw an tadang tingraw, napara sa bangging mayong liwanag!

Haen ka, sakong pagkamoot

na dai nanngad kinaabtan!